His diebus rete omnium gentium prorsus careo, nam non Pragae, in urbe celeberrima, sed ruri prope Albim Multaviamque confluentes versans modo hortis nostris modo studiis universitariis aliquid operae do.
Artem soluta oratione et quidem Latine scribendi te discere velle scripsisti et me rogavisti ut textos quosdam verisimiliter ex Anglico in Latinum conversos ad te mitterem quo facilius intellegeres quonam modo hoc genus interpretationes scribendae essent. Equidem tantum temporis non habeo ut nunc quidquid ad hanc rem interpreter (plurima enim alia mihi sunt facienda et ad pericula mense Septembri in universitate studiorum superanda et ad scholas meas praeparandas), at libenter aliquid abs te Latine conscriptum accipiam ut ego ipse cognoscam quam bene Latine scribas et quid in tua arte scribendi melius reddendum sit. Non dico me statim tibi responsum daturum, nihilominus noli dubitare quin daturus sim.
Ipse artem Latine scribendi non vertendo, sed in ea lingua cogitando (ideo etiam loquendo) didici; nam e linguis vernaculis conversiones semper aliquid non Latinum redolent neque mihi ad Latine scribendi discendum aptissimae videntur quamquam, ut verum dicam, interdum necessariae sunt. Ergo, si vis, ad me aliquot verba de te ipso Latine scribas – de te, aetate tua, studiis tuis, causa cur artem Latine scribendi discere cupias… Valeas quam optime.
Scribebam Vrbnae ad Aquas, dedi e municipali domo Horinensi a.d. XIII Kal. Sept. a. MMVIII mundi a Christo redempti
Tags: